Kapadokiyada qoyalar quladi: uch kishi halok bo‘ldi
Halok bo‘lganlarning ikki nafari Turkiya fuqarosi, biri esa xorijlik bo‘lgan.
Turkiyaning Nevshehir viloyati Go‘reme hududidagi Kapadokiyada qoyalar qulashi oqibatida uch kishi halok bo‘ldi, yana besh kishi jarohatlandi. Bu haqda Associated Press xabar berdi.
Hodisa Kapadokiya muzeyiga kirish qismida yuz bergan. Dastlabki ma’lumotlarga ko‘ra, kuchli yomg‘ir sababli yuzaga kelgan ko‘chki qoyalar qulashiga olib kelgan.
Turkiya ichki ishlar vaziri Mustafo Chiftchi qidiruv-qutqaruv ishlari yakunlanganini ma’lum qilgan. Uning qayd etishicha, vayronalar ostidan uch kishining jasadi topilgan, yana besh kishi jarohatlangan holda qutqarilgan.
Nevshehir viloyati gubernatori Husayn Ko‘kning aytishicha, halok bo‘lganlarning ikki nafari Turkiya fuqarosi, biri esa xorijlik bo‘lgan. Jarohatlangan sayyohlar shifoxonalarga yetkazilgan. Ulardan to‘rt nafari uyiga javob berilgan, yana bir kishining davolanishi davom etmoqda.
Hodisa Turkiyada Respublika kuni nishonlanayotgan, Kapadokiya sayyohlar bilan gavjum bo‘lgan vaqtda sodir bo‘lgan.
Ma’lumot uchun, Kapadokiyaning asosiy diqqatga sazovor joylaridan biri bo‘lgan “pari mo‘rilari” — shamol va suv eroziyasi natijasida shakllangan konussimon vulqon jinslaridir. Qadimda bu tabiiy qoyalar ichida turar joylar va diniy inshootlar barpo etilgan.
