AQSH vakillar palatasi Ukrainaga 14 milliard dollarlik yordam paketini tasdiqladi
Bu haqda BBC xabar berdi.
Ushbu mablag‘ning qariyb 6.5 milliardi harbiy yordam sifatida beriladi. Qolgani esa turli gumanitar va iqtisodiy muassasalar o‘rtasida taqsimlanadi. Hozircha ushbu loyiha senatda tasdiqlanmagan bo‘lsa-da, katta ehtimol bilan u maʼqullanadi.
"Jasur va erksevar Ukraina xalqi hamda bizning mintaqadagi ittifoqchilarimiz Vladimir Putinga va noqonuniy Rossiya bosqiniga qarshi kurash uchun zarur investitsiyalarni qo‘lga kiritadi", — degan Vakillar palatasi spikeri Nensi Pelosi.
Maʼlumot o‘rnida: Rossiya 24-fevral kuni Ukrainada harbiy operatsiya boshladi. Shundan keyin G‘arb davlatlari unga qarshi sanksiyalar joriy etdi. Bir vaqtning o‘zida Ukrainaga harbiy yordam berish ko‘paydi. Shu kunga qadar Kiyevga Yevropa va AQSH tomonidan minglab tankka qarshi raketalar, ko‘chma zenit tizimlari va o‘tochar qurollar yetkazib berildi.
Eslatib o‘tamiz, avvalroq Vashington Ukraina qochqinlarini qabul qilgan davlatlarga katta yordam ajratishini maʼlum qilgandi.
