Og‘ir va sekin: Putinning yordamchisi Ukraina bilan muzokaralar haqida maʼlumot berdi
Uning so‘zlariga ko‘ra, Ukraina Avstriya yoki Shvetsiya kabi neytral davlatga aylanmoqchi.
Kiyev bilan og‘ir muzokaralar olib borilmoqda. Bu haqda RF prezidenti yordamchisi Vladimir Medinskiy maʼlum qildi.
Medinskiy Ukraina bilan muzokaralarda Rossiya delegatsiyasiga boshchilik qilmoqda. “Muzokaralar og‘ir va sekin ketmoqda. Albatta, biz buning barchasini tez bo‘lishini istaymiz... biz tez orada tinchlikka erishishni istaymiz”, – degan u.
Medinskiy muzokaralardagi asosiy vazifa murakkab masalalar ichida tezda kelishuvga kelish imkonini beruvchi nuqtani topish ekanini taʼkidlagan.
Shuningdek, u Ukrainaning pozitsiyasini ochiqlаgan. Medinskiyning so‘zlariga ko‘ra, Kiyev Avstriya va Shvetsiya kabi neytral davlatga aylanishni istamoqda. Bu o‘z armiyasi va flotiga ega, ammo harbiy-siyosiy bloklarga qo‘shilmaydigan davlat bo‘lishni anglatadi. Ushbu masalalar ikki davlat mudofaa vazirliklari tomonidan muhokama qilinayotgani ochiqlangan.
Eslatib o‘tamiz, avvalroq Yaponiya Rossiya va Belarusga yangi sanksiyalar joriy etgani to‘g‘risida xabar berilgandi.
