Magistr talaba Olimpiya chempionligini maqsad qilgan

 

2021-yilning 25-oktabr - 6-noyabr kunlari Serbiyaning Belgrad shahrida boks bo‘yicha jahon chempionati bo‘lib o‘tgandi. Unda O‘zbekiston terma jamoasi safida Abdumalik Halakov kumush medalni qo‘lga kiritgan bo‘lsa, Madiyar Saidrahimov bronza medali sohibiga aylandi.

 

Ayni kunlarda bokschilarimiz navbatdagi mashg‘ulotlarini olib borishmoqda. Biz Madiyor Saidrahimovdan musobaqalarga tayyorgarlik jarayoni qanday o‘tayotgani haqida ma’lumot oldik.Sportchining so‘zlariga ko‘ra, u ayni damda O‘zbekiston jismoniy tarbiya va sport universitetining magistratura bosqichida tahsil oladi. 

“Men Jismoniy tarbiya va sport universitetida to‘rt yil davomida tahsil olganman. Hozirda magistratura bosqichida o‘qishimni davom ettirmoqdaman. Universitetda talabalarning ham o‘qishiga, ham mashg‘ulot o‘tkazishiga juda yaxshi imkoniyatlar yaratilgan”. 

Madiyor Saidrahimov ana shunday sharoitlar natijasida hozirda xalqaro musobaqalarda munosib ishtirok etib kelayotganini ta’kidladi. 
O‘tgan yili Serbiyada o‘tgan jahon chempionatidan so‘ng bokschi mashg‘ulotlarni davom ettirmoqda. 

“2023-yil yurtimizda jahon chempionati, 2024-yilda esa Fransiyada Olimpiya o‘yinlari o‘tkaziladi. Bugungi kunda ushbu turnirlarga qizg‘in tayyorgarlik jarayonini olib boryapmiz”. 

Madiyor maqsadi mazkur musobaqalarda oltin medalni qo‘lga kiritish ekanligini aytib o‘tdi. 2021 yilgi jahon chempionatida chempionlik uchun unga biroz tajriba yetishmaganini ma’lum qildi.

“Yarim finalda kubalik kuchli bokschiga imkoniyatni boy berib qo‘ydim. Keyingi chempionatlarda chempionlik uchun bemalol kurash olib borsam bo‘ladi”. 

Sportchi navbatdagi turnirlarda o‘zbek bokschilarining g‘alabali onlari yana uzoq davom etishini ta’kidladi.

 

Jamshidbek AMIROV suhbatlashdi