AQSH afg‘onlarga navbatdagi gumanitar yordam ajratdi
Avvalroq London Afg‘oniston uchun 374 million dollar gumanitar yordam jo‘natgan edi.
AQSH Afg‘onistonga qo‘shimcha 204 million dollarlik gumanitar yordam beradi. Bu haqda Qo‘shma Shtatlar Davlat departamenti matbuot kotibi Ned Prays maʼlum qildi.
"Biz Afg‘oniston xalqini qo‘llab-quvvatlash maqsadida 204 million dollar atrofida qo‘shimcha gumanitar yordam beramiz. Shu tariqa 2021 yil avgustidan buyon yetkazib berilgan yordam miqdori 720 million dollarni tashkil etadi", — deyiladi Prays bayonotida.
Ajratilgan mablag‘lar BMT tuzilmalari va qator xalqaro gumanitar tashkilotlar orasida taqsimlanadi. Bu pullar oziq-ovqat, suv sotib olish, tibbiy xizmatlar ko‘rsatish, Afg‘oniston aholisiga boshpana berish va huquqiy himoya uchun sarflanadi.
"Qo‘shma Shtatlar hamon afg‘on xalqining gumanitar ehtiyojlarini qo‘llab-quvvatlashga sodiq va "Tolibon " rahbariyatidan barcha fuqarolar, jumladan afg‘on ayollarining taʼlim olish huquqini hurmat qilishni talab qilishda davom etadi", — deb qo‘shimcha qilgan Prays.
Avvalroq Buyuk Britaniya Afg‘oniston uchun 374 million dollar ajratgandi.
