Teskari targ‘ibot yuritmaslik kerak: pensioner uchun hech narsa o‘zgarmaydi
Pensiya to‘lash bilan bog‘liq kechagi qaror turlicha talqinlarga, ayrim manbalarda esa hatto teskari targ‘ibotga sabab bo‘lmoqda.
"Berdisini aytmay", "xudosini aytib", odamlarni chalg‘itish xayrli emas.
Avvalo aytish kerakki, 1 maydan boshlab, bank kartalari orqali oluvchilarga har oylik pensiya va nafaqa pulining 1 foizi miqdorida qo‘shimcha to‘lov to‘lab beriladi. Yaʼni pensionerlar kartasiga 1% ortiqcha pul kelib tushadi.
AT “Xalq banki”ning sayyor kassalari fuqarolarga naqd pulda yetkazib berish xizmatlari uchun 1 foiz miqdorda haq oladi.
Boshqacha aytganda, pensiyasini naqd pulda oladiganlar uchun hech narsa o‘zgarmaydi, naqd pul kerak bo‘lmagan pensionerlar uchun pensiya summasi 1%ga ko‘payadi.
Bu nima uchun qilinayapti? Birinchi navbatda qog‘oz shakllarda hisob yuritishning eskirgan shakllaridan voz kechish uchun. Byurokratik zanjirlarni kamaytirish uchun. Pensiya tarqatishda maʼmurchilikni yaxshilash uchun.
