AQSH Afg‘onistonda qancha harbiy texnika qoldirib ketgan?
Uning umumiy qiymati ochiqlandi.
AQSH Afg‘onistonda 7 milliard dollardan ortiq harbiy texnika qoldirib ketgan. Bu haqda CNN xabar berdi.
Telekanal Pentagonning Kongressga taqdim etgan hisobotiga asoslanib yuqoridagi xabarni tarqatgan. Unga ko‘ra, Qo‘shma Shtatlar 2005-2021 yillarda afg‘on hukumatiga jami 18.6 milliard dollarlik harbiy anjomlar taqdim etgan. 2021 yilda Amerika qo‘shinlari Afg‘onistonni tark etgach, bu yerda 7.12 milliardlik uskuna qolib ketgan. Hozirda u "Tolibon" qo‘liga o‘tgan.
CNN maʼlumotlariga asosan, Afg‘onistonda Amerika samolyotlari, harbiy avtomobillar, aloqa vositalari va boshqa uskunalar qolgan. Pentagon ortga qaytib ularni qaytarib olib kelishni yoki o‘sha joyning o‘zida yo‘q qilishni rejalashtirmayapti. Shu bilan birga texnikaning katta qismi ishlab turishi uchun doimiy ravishda xizmat ko‘rsatilishga muhtoj.
Avvalroq Afg‘oniston mudofaa vaziri Pokiston aviazarbalariga keskin norozilik bildirgandi.
