Tojikiston ham toliblarga afg‘on samolyotlarini qaytarmaydi
Avvalroq O‘zbekiston ham shunday qaror qabul qilgandi.
"Tolibon" hokimiyatni egallagach, Tojikistonga olib kelingan afg‘on samolyotlari toliblarga berilmaydi. Bu haqda AQSHning Tojikistondagi elchisi Jon Mark Pommershaym maʼlum qildi.
Uning so‘zlariga ko‘ra, hozirda bu masala Vashington va Dushanbe tomonidan ko‘rib chiqilmoqda. Ammo rejada ularni "Tolibon"ga qaytarish varianti yo‘q.
Avvalroq O‘zbekiston ham samolyot va vertolyotlar Afg‘onistonga qaytarilmasligini maʼlum qilgandi. O‘zbekiston Respublikasi Prezidentining Afg‘oniston bo‘yicha maxsus vakili Ismatulla Ergashev bu qarorni samolyot va vertolyotlar AQSH mulki ekanligi bilan bog‘lagan.
Turli maʼlumotlarga ko‘ra, Afg‘oniston harbiy-havo kuchlariga tegishli 25 samolyot va vertolyotlar mamlakat hududidan olib chiqib ketilgan.
