Hindistondan bug‘doy olib chiqish taqiqlandi
Avvalroq Dehli dunyoning eng yirik don eksportchisiga aylanishni maqsad qilgandi.
Hindiston bug‘doy eksportini taqiqlab qo‘ydi. Bu haqda Reuters agentligi xabar berdi.
Ushbu qaror kuchga kirgan va g‘alla narxining oshishi fonida qabul qilingan. Faqatgina avvaldan kelishuvga ega davlatlargagina bug‘doy yetkazib beriladi.
Hindiston dunyoda bug‘doy yetishtirish bo‘yicha yetakchi davlatlardan hisoblanadi. Ammo uning katta qismi ichki isteʼmolga yo‘naltiriladi.
Bundan oldin Dehli Rossiya-Ukraina mojarosi tufayli yuzaga kelgan don bozoridagi bo‘shliqni to‘ldirishini va jahonning eng yirik bug‘doy eksportyoriga aylanishini eʼlon qilgandi. Mart oyida Hindiston eng yirik g‘alla importyori – Misrga don yetkazib berish bo‘yicha kelishuvga erishgandi.
Avvalroq Qozog‘iston ham bug‘doy va un eksportiga cheklov o‘rnatgandi.
