YI pozitsiyasidan qatʼiy nazar Berlin Rossiya neftidan voz kechmoqchi
Shuningdek, hozirda muqobil yetkazib beruvchilar bilan muzokaralar o‘tkazilmoqda.
Germaniya yil oxiriga qadar Rossiya nefti importidan voz kechadi. Bu haqda Bloomberg agentligi xabar berdi.
Unga ko‘ra, Olaf Shols hukumati Moskvaning Ukrainadagi harakatlariga javob choralari sifatida rus "qora oltin"idan voz kechadi. Hozirda Berlin boshqa yetkazib beruvchilar bilan muzokaralar olib bormoqda. Ammo aynan qaysi davlatlardan neft sotib olinishi hozircha oshkor qilinmayapti. Bloomberg bilan suhbatlashgan manbalar Germaniya hukumatining olti-yetti oy ichida logistika bilan bog‘liq masalalarni hal qilishiga ishonch bildirgan.
Agentlik suhbatdoshlarining qo‘shimcha qilishicha, neft importini to‘xtatish Yevroittifoqning embargosidan qatʼiy nazar amalga oshiriladi. Yevropaning qator davlatlari Rossiya neftidan hozir voz kecha olmasligini aytmoqda. Bu esa YEIning rus "qora oltin"iga embargo joriy eta olmasligiga sabab bo‘lyapti.
Avvalroq Yevropaning Rossiya uglevodorodlaridan voz kechishi uchun qancha mablag‘ zarurligi ochiqlangandi.
