AQSH Ukrainadan don olib chiqish yo‘llarini qidirmoqda
Bu masalada Vashington Turkiya bilan hamkorlik o‘rnatgan.
AQSH Ukrainadan bug‘doy va makkajo‘xori donini olib chiqish imkoniyatini ko‘rib chiqmoqda. Bu haqda CNN xabar berdi.
Unga ko‘ra, Vashington oziq-ovqatning quruqlik, havo va dengiz orqali olib chiqishning xavfsiz yo‘llarini qidiryapti. Telekanal maʼlumotlariga ko‘ra, ushbu amaliyotda eng muhim o‘rin tutadigan davlatlardan biri Turkiya hisoblanadi. Hozirda Anqara Rossiya bilan bu masalada muzokaralarga jalb qilingan.
Qayd etilishicha, Ukrainadan don mahsulotlarini olib ketish AQSH tashabbusi bilan chaqirilgan BMT shtab-kvartirasida bo‘lib o‘tadigan konferensiyaning asosiy mavzusi bo‘ladi. Konferensiya may oyida bo‘lib o‘tadi. Unda AQSH davlat kotibi Entoni Blinken va Turkiya tashqi ishlar vaziri Mavlud Chavusho‘g‘lu ishtirok etishi kutilmoqda.
Avvalroq Hindiston bug‘doy eksportini taqiqlab qo‘ygandi.
