Turkmaniston Afg‘onistonga temiryo‘lchilar jo‘natdi
Ular 30 kilometrli temiryo‘l qurilishini yakunlaydi.
Turkmanistonlik mutaxassislar Akina-Andxoy temiryo‘li qurilishini davom ettirish uchun Afg‘onistonga keldi. Bu haqda Turkmaniston TIV xabar berdi.
Afg‘onistonda ularni Balx viloyati temiryo‘l boshqarmasi va boshqa tashkilotlar rahbarlari kutib olgan. Temiryo‘lchilar o‘zi bilan barcha zarur texnika va qurilish moslamalarini olib kelgan.
Ushbu temiryo‘l qurilishi 2019 yil iyulida boshlangan. Ammo turli sabablarga ko‘ra uning davom ettirilishi ortga surib kelindi. Magistralning umumiy uzunligi 30 kilometrni tashkil etadi. Turkman mutaxassislari yana 800 metr joyga temiryo‘l yotqizishi kerak. Qurilish ishlari bir oyda tugashi kutilmoqda.
Avvalroq Sardor Umrzoqov Afg‘oniston tashqi ishlar vaziri v.b. Amir Xon Mutaqqiy bilan Transafg‘on temiryo‘li qurilishi masalasini muhokama qilgandi.
