NATOning yirik dengiz mashg‘ulotlari boshlandi
Unga 14 suvosti va suvusti kemalari jalb qilingan.
Atlantika okeani shimolida NATOning suvosti kemalariga qarshi yirik mashg‘ulotlari boshlandi. Bu haqda alyans rasman maʼlum qildi.
Mashg‘ulotlar Dynamic Mongoose deb ataladi. O‘tgan haftada unda ishtirok etish uchun Islandiyaning Reykyavik portiga NATOning to‘qqiz davlatlari suvosti va suvusti harbiy kemalari kelgan.
O‘quv mashqlari GIUK deb ataladigan chiziqda — NATOning Shimoliy Atlantikadagi suvosti kemalariga qarshi mudofaa chizig‘ida o‘tkaziladi. U Grenlandiya, Islandiya va Buyuk Britaniya o‘rtasida joylashgan. Bu yerga alyansning SOSUS suvosti kemalariga qarshi gidroakustik ovozli kuzatuv tizimi joylashtirilgan.
Mashg‘ulotlarda AQSH, Buyuk Britaniya, Germaniya, Fransiya, Kanada, Norvegiya, Daniya, Niderlandiya va Portugaliyadan uchta suvosti kemasi, 11 harbiy kema va 16 patrul samolyotlari ishtirok etadi.
Avvalroq NATO kemalari Boltiq dengiziga kirgani to‘g‘risida xabar berilgandi.
