Kadastri yo‘qligi uchun 3 karra soliq qo‘llash tartibi to‘xtatildi
Prezident bu bo‘yicha mutasaddilarga yangi qonun ishlab chiqishni topshirdi.
Bugun, 18-iyul kuni Prezident Shavkat Mirziyoyev raisligida ekin yerlari va tomorqadan samarali foydalanish orqali oziq-ovqat yetishtirishni va aholi daromadlarini ko‘paytirish bo‘yicha videoselektor yig‘ilishi bo‘lib o‘tmoqda.
Yig‘ilishda kadastr qilinmagan aholi xonadonlari masalasiga to‘xtalib o‘tilgan. Ma’lum qilinishicha, 2 million 600 mingta uylarning kadastr hujjatlari mavjud emas.
Ushbu aholi tomorqa uchun kredit, subsidiya hamda uy-joyini kengaytirishga ipotekadan foydalana olmayotgani haqida Xalq qabulxonalariga murojaatlar tushmoqda. Ustiga ustak, kadastri bo‘lmagani uchun yer solig‘i 3 karra miqdorda hisoblanmoqda.
Shu bois Adliya vazirligi, Soliq qo‘mitasi, Kadastr agentligiga bir hafta muddatda ishchi guruhlarini shakllantirib, ishlarni boshlash topshirilgan.
Ishchi guruhlari 1 oktyabrga qadar mahallabay kadastr hujjati bo‘lmagan xonadonlarning elektron ro‘yxatini shakllantiradi. Uy-joyga bo‘lgan huquqlarni e’tirof etishga asos bo‘luvchi hujjatlarni to‘playdi va elektron bazaga kiritadi.
Mutasaddilarga respublikaning barcha hududlarida kadastri yo‘q xonadonlar masalasini uzil-kesil hal qilish uchun alohida qonun loyihasini ishlab chiqib, muhokamaga kiritish vazifasi qo‘yildi.
Yangi qonun qabul qilinguniga qadar bu uy-joy egalariga uch karra oshirilgan soliq qo‘llash to‘xtatib turishga qaror qilindi.
