Pokistonda harbiy vertolyot qulab tushdi
Mahalliy harbiylar vertolyot qoldiqlari topilgani, tirik qolganlar yo‘qligini maʼlum qildi.
Pokiston janubi-g‘arbidagi Belujiston viloyatida harbiy vertolyot qulab tushdi va 6 kishi halok bo‘ldi.
"Vertolyot suv toshqinidan jabrlanganlarga yordam berish uchun ketayotgan edi. Keyinchalik u bilan aloqa uzilib qoldi. Samolyotdagi olti kishi halok bo‘ldi. Ular orasida 12-korpusning katta harbiy qo‘mondoni general-leytenant Sarfraz Ali ham bor", deyiladi xabarda.
Dastlabki maʼlumotlarga ko‘ra, halokatga noqulay ob-havo sabab bo‘lgan.
Pokiston Bosh vaziri Shahboz Sharif qurbonlarning yaqinlariga hamdardlik bildirdi.
Pokistonning tabiiy ofatlarga qarshi kurash bo‘yicha milliy boshqarmasi maʼlumotlariga ko‘ra, 14 iyundan buyon mamlakatda musson yomg‘irlari va toshqinlar tufayli 502 kishi halok bo‘lgan, 593 kishi jarohatlangan.
