Xorazmda 5 yoshli bola bog‘chada vafot etdi
Holat yuzasidan viloyat MTB ma’lumot berdi.
Xorazm viloyatining Xonqa tumanidagi bog‘chada 5 yoshli bola vafot etdi. Holat yuzasidan viloyat maktabgacha ta’lim boshqarmasi axborot xizmati ma’lumot berdi.
Hodisa Xonqa tumani “Toma” mahallasida joylashgan 24-sonli davlat maktabgacha ta’lim tashkilotida ro‘y bergan. Muassasada tushlikdan so‘ng 5 yoshli tarbiyalanuvchi O‘. Sh. A.ning tobi qochgan va zudlik bilan tez yordam chaqirilgan.
Ma’lum qilinishicha, shundan so‘ng bola vafot etgan.
“Bu bo‘yicha sud-tibbiy ekspertizasining xulosasiga ko‘ra, shuningdek, huquqni muhofaza quluvchi tashkilotlar tomonidan yakuniy xulosa berilgach, Maktabgacha ta’lim vazirligi axborot xizmati tomonidan to‘liq bayonot beriladi”, — deyiladi xabarda.
Eslatib o‘tamiz, Namangan viloyatining Chust tumanidagi bog‘chada 1-avgust kuni 5 yoshli bola tilini chaynab yuborib, vafot etgandi. Shundan so‘ng Maktabgacha ta’lim vazirligi holat bo‘yicha tergov ishlari o‘tkazilayotganini bildirgan.
Javohirbek Tursunov
