O‘zbekiston va Ozarbayjon Prezidentlari telefon orqali muloqot qildi
Unda Samarqand shahridagi Shanxay hamkorlik tashkiloti hamda Turkiy davlatlar tashkiloti sammitlarining rejasi va kun tartibi ham ko‘rib chiqildi.
Bugun O‘zbekiston Respublikasi Prezidenti Shavkat Mirziyoyev Ozarbayjon Respublikasi Prezidenti Ilhom Aliyev bilan telefon orqali suhbatlashdi.
Muloqotda ikki mamlakat o‘rtasidagi o‘zaro manfaatli hamkorlikni yana-da rivojlantirish va strategik sheriklik munosabatlarini mustahkamlash masalalari ko‘rib chiqildi.
Joriy yil iyun oyida o‘tkazilgan oliy darajadagi uchrashuvlar yakunida erishilgan kelishuvlarni amalga oshirishdagi sezilarli yutuqlar mamnuniyat bilan qayd etildi.
Avgust oyi boshida qo‘shma Hukumatlararo komissiyaning navbatdagi yig‘ilishi hamda O‘zbekiston, Ozarbayjon va Turkiya tashqi ishlar, transport va savdo vazirlarining birinchi uchrashuvi samarali o‘tkazildi.
Joriy yilda o‘zaro tovar ayirboshlash 70 foizga oshdi. Qishloq xo‘jaligi, ipakchilik va to‘qimachilik sanoati, mashinasozlik, kimyo va boshqa tarmoqlarda qo‘shma kooperatsiya loyihalarini amalga oshirish boshlandi. O‘zbekiston-Ozarbayjon investitsiya fondini tez fursatda ishga tushirish ishlari olib borilmoqda. Madaniy-gumanitar almashinuv kengaymoqda.
Davlat rahbarlari amaliy hamkorlikni yana-da rivojlantirish lozim ekanini taʼkidladilar. Shu maʼnoda, kelgusi kuzda ikki mamlakat hududlari forumi va sanoat salohiyati ko‘rgazmasini o‘tkazish muhimligi qayd etildi.
Mintaqaviy kun tartibi yuzasidan ham fikr almashildi. Bo‘lajak ko‘p tomonlama uchrashuvlar, shu jumladan Samarqand shahridagi Shanxay hamkorlik tashkiloti va Turkiy davlatlar tashkiloti sammitlarining rejasi va kun tartibi ko‘rib chiqildi.
O‘zbekiston va Ozarbayjon Prezidentlarining telefon orqali muloqoti har doimgidek ochiq, samimiy va do‘stona ruhda o‘tdi.
