Toshkentning ikkita tumanida “svet” o‘chib qoldi
Vazirlik elektr ta’minoti qachon tiklanishini ma’lum qildi.
Toshkent shahrining ikkita tumanida elektr ta’minotida uzilish kuzatilmoqda. Bu haqda Energetika vazirligi matbuot xizmati xabar berdi.
Qayd etilishicha, bugun soat 21:10 da Yashnobod va Mirobod tumanlarining ayrim hududlarini elektr energiyasi bilan ta’minlovchi yuqori kuchlanishli 110 kV tarmog‘ida nosozlik yuzaga kelgan. Buning natijasida Yashnobod tumanining Aviasozlar, “Gʻalabaning 40 yilligi” massivlari, Muxtor Ashrafiy ko‘chalari va Mirobod tumanining Fitrat, Yangi Zamon, Inoqobod, Fayzobod, Eski Otchopar, Oqbilol ko‘chalarida elektr ta’minotida uzilish yuz bermoqda.
Hozirda Energetika vazirligi, Toshkent shahar elektr tarmoqlari korxonasi mutaxassislari tomonidan nosozlikni bartaraf etish ishlari olib borilmoqda. Ta’mirlash ishlari qisqa fursatda (1,5 soatda) yakunlanadi va elektr ta’minoti qayta tiklanadi.
“Keltirilgan noqulayliklar uchun iste’molchilardan uzr so‘raymiz”, — deyiladi xabarda.
Eslatib o‘tamiz, avvalroq Energetika vazirligi bayram kunlari iste’molchilarga energiya resurslari barqaror yetkazib berilishini ma’lum qilgandi.
