Toshkent aeroportida MIBning xizmat ko‘rsatish bo‘limi paydo bo‘ldi
Bo‘lim O‘zbekiston fuqarolarining chet elga chiqishiga taqiq qo‘yish bilan bog‘liq muammoli vaziyatlarning yechimi bilan shug‘ullanadi.
Kommunal to‘lovlar, kreditlar, jarimalar va boshqa qarzlar o‘z vaqtida to‘lanmagani uchun O‘zbekistondan tashqariga chiqish cheklanishi mumkin. Shuningdek, cheklov inson omili sabab noto‘g‘ri qo‘yilgan bo‘lishi mumkin. Kelgusida bunday holatlarning oldini olish uchun MIB xodimlari aeroportda 24/7 ishlaydi.
MIB bo‘limi Toshkent xalqaro aeroportining jo‘nab ketish zalidagi maʼlumot stolida joylashgan. Xodim yo‘lovchining iltimosiga binoan qarz bor yoki yo‘qligini aytishi mumkin. Shuningdek, qarzni to‘lab va to‘lov hujjatini taqdim etilganidan so‘ng MIB xodimi tizimni yangilashi va yo‘lovchidan ketish uchun taqiqni olib tashlashi mumkin.
To‘lovlar faqat elektron to‘lov tizimlari (Click, PayMe, Apelsin va boshqalar) orqali qabul qilinadi.
