O‘zbek-qirg‘iz chegaraoldi hududida GES quriladi

 

O‘zbek-qirg‘iz chegaraoldi hududida quvvati 6,7 MVt bo‘lgan Kogart kichik gidroelektr stansiyasi quriladi. Bu haqida Investitsiyalar va tashqi savdo vaziri Jamshid Xodjayev va Qirg‘iziston Vazirlar Mahkamasi raisining o‘rinbosari Baxit Toroboyev o‘rtasida uchrashuvda maʼlum qilindi. Bu haqda Sputnik xabar berdi.

 

Onlayn bo‘lib o‘tgan uchrashuvda chegaraoldi hududda Sanoat kooperatsiyasi markazini tashkil etish, to‘qimachilik majmuasi va Kogart kichik gidroelektr stansiyasini qurish masalalari ko‘rib chiqildi. Tomonlar investitsiya kelishuvlari to‘plamini ishlab chiqishni imkon qadar tezroq yakunlash bo‘yicha kelishuvga erishishdi.

 

Tomonlar quyidagi hamkorlikka kelishib olishdi:

 

Oziq-ovqat va urug‘lik kartoshka yetishtirishni tashkil etish;

Chorvachilik komplekslarini yaratish;

Qishloq xo‘jaligi mahsulotlari, issiqxonalar uchun uskunalar va jun mahsulotlari ishlab chiqarish uchun xomashyo yetkazib berish.

Shuningdek, transport va logistika sohasidagi hamkorlik sohasida yo‘lovchi avtobuslari va temir yo‘l tashishlarini qayta tiklash, ikki davlat o‘rtasidagi aviaqatnovlar soni ham ko‘paytiriladi.

 

Qolaversa, tomonlar “Irkeshtam — Daroot — Qo‘rg‘on — Uch-Qo‘rg‘on” avtomobil yo‘lini qurish imkoniyatlarini muhokama etib, ushbu yo‘nalishda barcha zarur choralarni ko‘rishga tayyorligini bildirishdi.

 

Uchrashuvda alohida tartibda Bishkek shahrida Ikki tomonlama hamkorlik bo‘yicha O‘zbekiston-Qirg‘iziston Hukumatlararo qo‘shma komissiyasining 10-yig‘ilishi va biznes-forumni ikki mamlakat mintaqalari rahbarlari ishtirokida yuqori tashkiliy darajada va mazmun jihatidan boyitilgan tarzda o‘tkazish masalalari ko‘rib chiqildi.