Kollej va texnikumlarda to‘lov-kontrakt oshirilmaydi
Bu bo‘yicha vazirlik ma’lumot berdi.
Kollej va texnikumlarda to‘lov-kontrakt miqdorlari oshirilmaydi, deya xabar bermoqda Oliy va o‘rta maxsus ta’lim vazirligi axborot xizmati.
Qayd etilishicha, professional ta’lim muassasalarida tahsil olayotgan o‘quvchilarga qulay sharoitlar yaratish, ularning ota-onalarini ijtimoiy qo‘llab-quvvatlash maqsadida hamda aholi to‘lov qobiliyatini inobatga olgan holda, istisno tariqasida, kollej va texnikumlarda 2022/2023-o‘quv yili uchun barcha bosqichdagi o‘quvchilarning to‘lov-kontrakt asosida o‘qitish qiymati miqdorlari 2021/2022-o‘quv yili uchun belgilangan miqdorlarda saqlab qolinadi.
Ma’lumot uchun: joriy yil kollej va texnikumlarga kunduzgi ta’lim shakli bo‘yicha 15 815 nafar o‘quvchi davlat granti asosida qabul qilindi.
Shuningdek, professional ta’lim muassasalariga ota-ona qaramog‘idan mahrum bo‘lgan o‘quvchilar hamda ijtimoiy himoyaga muhtoj oila farzandlari belgilangan tartibda qabul parametrlaridan tashqari qo‘shimcha davlat granti asosida qabul qilinadi.
