O‘quvchilarni bepul tushlik bilan taʼminlash uchun qo‘shimcha mablag‘ ajratiladi
XTVning yil boshida tasdiqlangan xarajatlariga qo‘shimcha 922 milliard so‘m ajratilmoqda.
Endilikda boshlang‘ich sinf o‘quvchilarini bepul tushlik bilan taʼminlashga qo‘shimcha mablag‘ yo‘naltiriladi.
Oliy Majlis Qonunchilik palatasi yalpi sessiyasida moliya vaziri Timur Ishmetov «2022 yil uchun O‘zbekiston Respublikasining Davlat byudjeti to‘g‘risida»gi qonunga o‘zgartishlar kiritish haqidagi qonun loyihasi bilan deputatlarni tanishtirdi.
Muhokamada byudjet taqchilligi 3 foizdan 4 foizga oshirilishi maʼlum qilingan. Xususan, ayrim birinchi darajali byudjet mablag‘lari taqsimlovchilar kesimidagi tegishli vazirlik va tashkilotlar ro‘yxati va mablag‘ hajmi ham ochiqlangan. Jumladan, XTVning yil boshida tasdiqlangan xarajatlariga qo‘shimcha 922 milliard so‘m ajratilmoqda.
Bundan Qoraqalpog‘iston va Xorazmda boshlang‘ich sinf o‘quvchilarini bepul ovqatlantirish uchun — 106 milliard so‘m yo‘naltirilishi aytilmoqda.
