Qoraqalpog‘istondagi tartibsizliklar bo‘yicha sud qachon boshlanishi ma’lum bo‘ldi
Avvalroq mazkur voqealar yuzasidan mustaqil tekshiruv o‘tkazish boshlangandi.
Qoraqalpog‘istondagi tartibsizliklar bo‘yicha sud jarayonlari 28-noyabr kuni boshlanadi. Bu haqda mustaqil tekshiruv o‘tkazish bo‘yicha komissiya ma’lum qildi.
Avvalroq 16 iyul kunidan Qoraqalpog‘iston Respublikasida yuz bergan holat va voqealarni o‘rganish hamda ular yuzasidan mustaqil tekshiruv o‘tkazish bo‘yicha komissiya o‘z ishini boshlagani xabar qilingadi.
Komissiya inson huquq va erkinliklarini ta’minlash, voqealarni har tomonlama va holis o‘rganish, shuningdek, olingan axborotlarni qayta tekshirish hamda o‘z faoliyatini jamoatchilik fikrini inobatga olgan holda tashkil qilishni asosiy vazifasi sifatida belgilagan.
Shu kunga qadar Komissiya a’zolari taklifi va Qoraqalpog‘iston Respublikasi Jo‘qorg‘i Kengesi iltimosnomasiga ko‘ra, Bosh prokuratura tomonidan 107 nafar ayblanuvchi jamoat kafilligi va qamoq ehtiyot chorasi insonparvarlik tamoyili asosida uy qamog‘i tarzidagi ehtiyot chorasiga almashtirilishi orqali o‘z oilasi bag‘riga qaytarilgan.
Tergov jarayonlari davomida ayblanuvchilarning saqlash sharoitlari, qiynoqqa solmaslik, advokat bilan ta’minlanganlik kabi masalalar Mustaqil komissiyaning doimiy nazoratida bo‘lgan. Komissiya a’zolari sud jarayonlarida ham kuzatuvchi sifatida ishtirok etishadi.
