Toshkent metrosida poyezd bir soatga to‘xtab qolgani aytildi
Holatga rasmiylar izoh berdi.
Bugun, 4-dekabr kuni Toshkent metrosida poyezd harakati to‘xtab qoldi. Holat yuzasidan “Toshkent metropoliteni” DUK rasmiy munosabat bildirdi.
Qayd etilishicha, soat 16:30 lar atrofida 37-sonli harakat tarkibi “Beruniy” bekatiga kirib kelgan va yo‘lovchilarni vagonlarga chiqargach, harakatlana olmagan.
Yo‘lovchilar oqimi tirbandligi va yo‘nalishdagi harakat jadvaliga ta’sir ko‘rsatmasligi uchun mashinist tomonidan belgilangan yo‘riqnomaga asosan yo‘lovchilar bekatga tushirilgan. Harakat tarkibi esa texnik ko‘rikdan o‘tkazish maqsadida tekshiruv yo‘lagiga yuborilgan.
Tezkor tekshiruv o‘tkazilganda 37-sonli harakat tarkibining 0003-sonli vagonida havo bosimi miqdori normal holatda emasligi aniqlangan hamda harakat jadvalini buzilishini oldini olish maqsadida 16:37 da mavjud zaxira poyezdi yo‘lga chiqarilgan. Ushbu poyezd bekatdagi barcha yo‘lovchilarni olib harkatni davom ettirgan.
Hozirda barcha poyezdlar belgilangan jadval asosida harakatlanmoqda.
