Filippinda suv toshqini qurbonlari va bedarak yo‘qolganlar soni yana ortdi
Avvalroq 39 kishi halok bo‘lgan va 25 kishi bedarak yo‘qolgandi.
Filippinda kuchli yomg‘ir oqibatida yuzaga kelgan suv toshqinlari tufayli 44 kishi halok bo‘ldi, 28 kishi bedarak yo‘qoldi. Bu haqda TASS xabar bermoqda.
Xavflarning oldini olish va tabiiy ofatlarni bartaraf etish bo‘yicha milliy kengashning juma kuni eʼlon qilingan hisobotida taʼkidlanganidek, suv toshqinidan respublikaning 10 ta hududida 509,3 mingdan ortiq kishi jabrlangan.
Agentlik maʼlumotlariga ko‘ra, 151 evakuatsiya markaziga 15,8 ming kishi ko‘chirilgan. Kamida 1,42 ming kishi uyini oldindan tark etgan, 12 kishi turli tan jarohatlari olgan. Respublikaning to‘qqiz viloyatida tabiiy ofat bilan bog‘liq 434 ta hodisa, jumladan, suv toshqinlari va ko‘chkilar qayd etilgan.
Eslatib o‘tamiz, avvalroq Filippinda kuchli yomg‘ir oqibatida yuzaga kelgan suv toshqinlari tufayli kamida 39 kishi halok bo‘ldi, 25 kishi bedarak yo‘qolgani haqida xabar berilgan edi.
