AQShdagi oraliq saylovning bozorlarga ta’siri: dollar kursi bir oy ichidagi eng past darajaga tushdi

AQShda bo‘lib o‘tgan oraliq saylovlarda demokratlarning g‘alaba qozonishi ortidan dollar kursi bir oydan ortiq vaqt ichidagi eng past darajaga tushdi. Shu bilan birga, neft narxi va AQSh davlat obligatsiyalari daromadliligi pasaydi.

 

5-noyabr kuni dollar indeksi 0,22 foizga pasayib, 101,25 punktni tashkil etdi. Bu 30-sentabrdan buyon qayd etilgan eng past ko‘rsatkichdir. Bir kun avval ham indeks 0,34 foizga pasaygan edi.

 

Reuters xabariga ko‘ra, demokratlar oraliq saylovlarda AQSh Senati va Vakillar palatasida ko‘pchilik o‘rinni qo‘lga kiritgan. Bu xabar ortidan AQSh davlat obligatsiyalari narxi va jahon fond bozorlaridagi aksiyalar qiymati oshgan.

 

National Australia Bank katta valyuta strategisti Rodrigo Katrilning fikricha, bozordagi o‘zgarishlar Donald Tramp ma’muriyatining siyosiy imkoniyatlari cheklanishi mumkinligi haqidagi kutilmalar bilan bog‘liq. Xususan, investorlar AQSh prezidentining Eronga qarshi urush yoki yangi savdo bojlarini joriy etish kabi keskin choralarni amalga oshirish imkoniyati kamayishini kutmoqda.

 

Mutaxassisning ta’kidlashicha, valyuta va moliya bozorlaridagi qisqa muddatli tebranishlar har doim ham uzoqroq muddatli tendensiyalarni aks ettirmaydi. Biroq neft narxi hamda obligatsiyalar  daromadliligining pasayishi tavakkalchilikka moyil investorlar kayfiyatiga ijobiy ta’sir ko‘rsatmoqda.

 

Shuningdek, 5-noyabr kuni yevro dollarga nisbatan 0,29 foizga qimmatlab, 1,1261 dollarga yetdi. Yaponiya iyenasi esa 0,27 foizga mustahkamlanib, bir dollar uchun 157,95 iyenani tashkil etdi.

 

AQShning 10 yillik davlat obligatsiyalari daromadliligi 4,5 bazis punktga pasayib, 4,847 foizga tushdi. Bu 10-sentyabrdan buyon eng past ko‘rsatkich hisoblanadi.

 

Kriptovalyutalar bozorida bitkoin 0,22 foizga, efir esa 0,11 foizga qimmatlashdi. Ularning qiymati mos ravishda 80 357,66 va 2 419,79 dollarni tashkil etdi.