Qoraqalpog‘istonda sharoiti og‘ir oilalarning eskirgan uylari taʼmirlanadi

 

Vazirlar Mahkamasining 02.02.2023-yildagi “Qoraqalpog‘iston Respublikasida aholi uchun munosib turmush sharoitlarini yaratish va mahallalar infratuzilmasini yana-da yaxshilash chora-tadbirlari to‘g‘risida”gi 52-son qarori qabul qilindi.

 

Hujjat bilan Qoraqalpog‘istonning Nukus shahri va tumanlaridagi og‘ir turmush sharoitidagi oilalarga tegishli uylarning tom qismini taʼmirlash (yopish) hamda yashash uchun yaroqsiz va avariya holatidagi uylarni yangidan qurish ishlarining yig‘ma parametrlari tasdiqlandi.

 

Amalga oshiriladigan qurilish-taʼmirlash va obodonlashtirish ishlari bo‘yicha buyurtmachi Nukus shahri va shimoliy tumanlarda Qoraqalpog‘iston Vazirlar Kengashi, viloyatlar va Toshkent shahar hokimliklari huzuridagi “Yagona buyurtmachi xizmati” DUK hisoblanadi.

 

Janubiy tumanlardagi uy-joylarning tom qismini taʼmirlash (yopish) va avariya holatidagi uy-joylarni yangidan qurish ishlari bo‘yicha Qoraqalpog‘iston Vazirlar Kengashi huzuridagi “Yagona buyurtmachi xizmati” DUK buyurtmachi etib belgilandi.

 

Janubiy tumanlardagi 2 000 km tuproq yo‘llarga qum-shag‘al yotqizish ishlari bo‘yicha Amudaryo, Beruniy, To‘rtko‘l va Ellikqalʼa tumanlari hokimliklarining Obodonlashtirish boshqarmalari buyurtmachi etib belgilandi.

 

Qarorda belgilangan chora-tadbirlarni qisqa muddatlarda yakunlash maqsadida pudratchi va loyiha tashkilotlarini, shuningdek, tovarlarni (ishlarni, xizmatlarni) yetkazib beruvchilarni tanlash to‘g‘risida eʼlon maxsus axborot portalida joylashtirilmaydi. Buyurtmachilarga elektron shaklda taklif bermasdan, eng yaxshi takliflarni aniqlash huquqi beriladi.

Hujjat Qonun hujjatlari maʼlumotlari milliy bazasida eʼlon qilingan va 3.02.2023 yildan kuchga kirdi.