Bugun Turkiya, Ozarbayjon va Shimoliy Kiprda «Turkiya — bir yurak» shiori ostida yordam aksiya o‘tkaziladi
Bu haqda Turkiya prezidenti ma’lum qildi.
Turkiya Favqulodda vaziyatlar boshqarmasining Anqaradagi bosh qarorgohida Prezident Rejep Tayyip Erdog‘anning respublika Vazirlar Mahkamasi yig‘ilishi yakunlari bo‘yicha murojaati tinglandi. Bu haqda Anadolu agentligi xabar bermoqda.
Ma’lum qilinishicha, Turkiya hukumati zilziladan zarar ko‘rgan barcha hududlarda yil davomida odamlar uchun sifatli va xavfsiz uy-joy qurilishini yakunlashni rejalashtirmoqda.
Shuningdek, Turkiya rahbarining so‘zlariga ko‘ra, tabiiy ofat hududida 28 ming turk askari xizmat qilmoqda.
«15-fevral kuni Turkiya vaqti bilan soat 20:00da «Turkiya – bir yurak» shiori ostida Turkiya, Ozarbayjon va Shimoliy Kiprdagi Turk Respublikasida zilzila qurbonlariga yordam aksiyasi bo‘lib o‘tadi», — deya qo‘shimcha qildi Erdog‘an.
Eslatib o‘tamiz, zilzila qurbonlari soni 35 400 kishidan oshdi. Jabrlanganlarning 13 ming 208 nafari shifoxonalarda davolanmoqda.
