Turkiyadagi zilzila qurbonlari soni 35 400 kishidan oshdi
Jabrlanganlarning 13 ming 208 nafari shifoxonalarda davolanmoqda.
Turkiya janubida sodir bo‘lgan dahshatli zilzila qurbonlari soni 35 418 nafarga yetdi. Bu haqda Turkiya Prezidenti Rejep Tayyip Erdog‘an respublika Vazirlar Mahkamasi yig‘ilishi yakunlari bo‘yicha o‘z murojaatida ma’lum qildi, deya xabar bermoqda Anadolu agentligi.
Yig‘ilish Turkiya Favqulodda vaziyatlar boshqarmasining Anqaradagi bosh qarorgohida bo‘lib o‘tdi.
Davlat rahbarining so‘zlariga ko‘ra, jabrlanganlarning 13 ming 208 nafari shifoxonalarda davolanmoqda.
Turkiya rahbari, shuningdek, dunyoning turli burchaklaridan kelgan mutaxassislar Turkiyadagi zilzilani «o‘zgacha tabiat hodisasi» deb ataganini eslatib o‘tdi.
Prezident Erdog‘anning ma’lum qilishicha, tabiiy ofat hududida qidiruv-qutqaruv va boshqa ishlarga 250 mingga yaqin davlat xizmatchisi jalb qilingan.
Uning qayd etishicha, zilziladan vayron bo‘lgan hududlarda qidiruv-qutqaruv ishlari omon qolganlar vayronalar ostidan olib chiqilgunga qadar davom etadi.
Davlat rahbarining so‘zlariga ko‘ra, kelasi oy Turkiya hukumati zilzila qurbonlari uchun 30 mingta uy qurishni boshlaydi. Hozirda 1,6 million kishi boshpanaga muhtoj.
«Tabiy ofat sodir bo‘lgan hududda 175 ming chodir va 5 ming 400 konteyner tipidagi uylar o‘rnatildi», — dedi Erdog‘an.
