YETTB: Rossiya biznesi ko‘chib kelishi Markaziy Osiyo iqtisodiyoti o‘sishiga yordam beradi
Yevropa tiklanish va taraqqiyot banki ekspertlari 2023 va 2024 yillarda mintaqada iqtisodiy o‘sish yuqori surʼatlarda qolishini prognoz qilmoqda.
2023 yilda Markaziy Osiyo davlatlari iqtisodiyoti 4.9 foizga va 2024 yilda 5.4 foizga o‘sadi. Bu haqda Yevropa tiklanish va taraqqiyot banki hisobotida so‘z boradi.
Bunga sabab qilib uch omil ko‘rsatilgan: infratuzilmaga investitsiyalar oqimi, energotashuvchilarning baland narxi va Rossiya biznesi relokatsiyasi.
Bank faoliyat yuritadigan davlatlar oracida 2023 yilda eng yirik o‘rtacha o‘sish Qozog‘iston, Qirg‘iziston, Mo‘g‘uliston, Tojikiston, Turkmaniston va O‘zbekistonda yuz berishi mumkin (barcha mintaqalar bo‘yicha umumiy prognoz +2.1 %). Real YAIM eng ko‘p Tojikiston (8 foiz), Qirg‘iziston va Mo‘g‘uliston (7 foiz), Turkmaniston va O‘zbekiston (6.5 foiz)da o‘sishi kutilmoqda. Qozog‘istonda bu 3.5 foiz atrofida bo‘ladi.
Ekspertlar Markaziy Osiyo va Kavkazga YEI, Buyuk Britaniya va AQSHdan eksport keskin oshganini qayd etishgan. Bu vositachilik savdosining oshganini ko‘rsatadi: import qilingan tovarlar Rossiyaga reeksport qilinadi. Armaniston va Qirg‘izistonda bunday savdo YAIMning 4-6 foiziga to‘g‘ri keldi. Bu o‘z navbatida mahalliy valyutalarning dollarga nisbatan mustahkamlanishiga sabab bo‘ldi.
