Andijonda IIB xodimiga pora taklif qilgan ayol ushlandi
Hozirda unga nisbatan jinoyat ishi ochilgan.
Andijon shahrida ichki ishlar organi xodimiga pora taklif qilgan ayol qo‘lga olindi. Bu haqda viloyat IIB axborot xizmati xabar berdi.
Qayd etilishicha, muqaddam uch marotaba sudlangan, 1975-yilda tug‘ilgan fuqaro M.G. Andijon shahrining 3-kichik daha hududida vaqtincha yashab, moddiy manfaat evaziga ushbu xonadonda erkak va ayol tanishlarining jinsiy aloqa qilishlari uchun sharoit yaratib bergan. Bu holat hududiy ichki ishlar organlari profilaktika inspektori tomonidan aniqlanib, ayolning ushbu qilmishi rasmiylashtirilgan.
Fuqaro M.G sodir etgan qilmishiga qonuniy chora ko‘rmaslik evaziga profilaktika inspektoriga pora sifatida 200 AQSH dollari taklif etgan. Biroq profilaktika inspektori fuqaroning pora berishi jinoiy javobgarlikni keltirib chiqarishi to‘g‘risida bir necha marotaba tushuntirsada, fuqaro pora taklif qilishda davom etgan.
2023 yil 3 fevral kuni o‘tkazilgan tezkor tadbir davomida fuqaro M.G. ishini ijobiy hal qilib berish evaziga profilaktika inspektoriga pora sifatida 200 AQSH dollarini bergan vaqtda ashyoviy dalillar bilan qo‘lga olingan.
Mazkur holat bo‘yicha fuqaro M.G.ga nisbatan Jinoyat kodeksining 211-moddasi 1-qismi (pora berish) bilan jinoyat ishi qo‘zg‘atilib, hozirda dastlabki tergov harakatlari o‘tkazilmoqda.
