Turkiya muxolifati prezidentlikka nomzodini ko‘rsatdi
Erdog‘an 10 mart kuni saylovga tayyorgarlik bo‘yicha farmonni imzolashini maʼlum qildi.
Olti partiyadan iborat «Xalq ittifoqi» bahorgi saylovlarda Kemal Qilichdoro‘g‘lini davlat rahbari lavozimiga yagona nomzod sifatida ko‘rsatdi. Bu haqda euronews xabar qildi.
Qiyin kechgan munozaralarda «Yaxshi partiya» rahbari Meral Akshener uning nomzodiga rozi bo‘lmagan. U ko‘proq mashhur deb hisoblagan Istanbul hokimi Ekrem Imomo‘g‘li yoki Anqara hokimi Mansur Yavashni nomzod etib ko‘rsatishni taklif qilgan.
74 yoshli Kemal Qilichdoro‘g‘li Turkiyaning birinchi prezidenti Mustafo Kamol Otaturk tomonidan asos solingan Respublika Xalq partiyasi raisi.
Muxolifat, agar uning nomzodi saylovlarda g‘alaba qozonsa, mamlakatda parlament tizimini mustahkamlash uchun prezident vakolatlarining bir qismini cheklashni taklif qilmoqda.
Rajab Toyyib Erdog‘an 10 mart kuni saylovga tayyorgarlik bo‘yicha farmonni imzolashini maʼlum qildi. Farmon eʼlon qilinganidan keyin 60 kunlik saylovoldi davri boshlanadi. Ovoz berish 14 may kuni bo‘lib o‘tadi.
Saylovoldi tashviqoti mamlakatda halokatli zilzila oqibatlarini bartaraf etish jarayoni fonida o‘tadi. Nomzodlarning saylovoldi bahslarida shu mavzu ustunlik qiladi.
Mahalliy tahlilchilarga ko‘ra, Erdog‘an va Qilichdoro‘g‘lining g‘alaba qozonish imkoniyatlari deyarli teng.
