Global iqtisodiy o‘sish prognozlari yaxshilandi
Iqtisodiy hamkorlik va taraqqiyot tashkiloti bu bo‘yicha maxsus hisobot eʼlon qildi.
Iqtisodiy hamkorlik va taraqqiyot tashkiloti 2023 yilda dunyo iqtisodiyoti 2.6 foizga o‘sishini prognoz qildi. Bu 2022 yil nobyaridagi taxminlardan yuqori ko‘rsatkich hisoblanadi.
O‘tgan yili oxirida tashkilot global iqtisodiyot 2.2 foizga o‘sishini maʼlum qilgandi. 2024 yilgi ko‘rsatkichlar ham yaxshilangan: noyabrda bu 2.7 foiz deb ko‘rsatilgan bo‘lsa, endilikda 2.9 foizgacha oshirildi. Ekspertlarning fikricha, isteʼmolchilar va ishlab chiqaruvchilarning kayfiyati asta-sekin yaxshilanib bormoqda, inflyatsiya bosimi kamaymoqda.
Dunyo iqtisodiyoti o‘sishiga ijobiy taʼsir ko‘rsatadigan boshqa omil sifatida tahlilchilar Xitoy bozorining ochilishi va xomashyo tovarlariga narxlarning pasayishini ko‘rsatishgan.
Shu bilan birga global iqtisodiy o‘sishning 2023 va 2024 yilgi surʼatlari uzoq istiqboldagi trend darajasidan past bo‘ladi, bunda dunyoning eng yirik banklari tomonidan pul-kredit siyosatining qattiqlashishi sabab qilib ko‘rsatilgan. Ukraina urushining nomaʼlum yakuni ham o‘sishning sekinlashishiga olib keladi.
