Putining qarori G‘arbning paytavasiga qurt tushirdi
“Rossiya Belarusda yadro qurolini joylashtirishdan voz kechmaydi”, — dedi Peskov.
G‘arbning munosabati Rossiya rasmiylarining Belarusda taktik yadro qurolini joylashtirish rejalariga taʼsir qilmaydi. Bu haqda Prezident matbuot kotibi Dmitriy Peskov maʼlum qildi.
“Bunday munosabat, albatta, Rossiyaning rejalarini o‘zgartira olmaydi. Prezident bayonotida hammasini tushuntirib berdi, bunga qo‘shimcha qiladigan hech narsa yo‘q”, — dedi Kreml matbuot kotibi.
Eslatib o‘tamiz, 25 mart kuni Vladimir Putin Belarusda taktik yadroviy qurollar saqlanadigan omborning qurilishi iyulga qadar yakunlanishini maʼlum qilgandi. Qo‘shma Shtatlar Rossiyaning Belarusda yadro qurolini joylashtirish alomatlarini hozircha ko‘rmayapti.
Yevropa diplomatiyasi rahbari Josep Borrell Yevropa Ittifoqining Rossiyaga qarshi yangi sanksiyalar joriy etishga tayyorligini eʼlon qildi, buni Litva qo‘llab-quvvatlamoqda. Germaniya Tashqi ishlar vazirligi janob Putinning so‘zlarini yadroviy qo‘rqitishga urinish deb atadi. Fransiya esa Rossiya Federatsiyasini o‘z qarorini qayta ko‘rib chiqishga chaqirdi.
