Shimoliy Koreya yadro quroli portlashini mashq qildi
Kecha KXDR Yapon dengizi tomon ikkita ballistik raketa uchirgandi.
Shimoliy Koreya 27 mart kuni Yapon dengiziga ballistik raketa uchirganini tan oldi. Bu haqda "Renxap" agentligi xabar berdi.
KXDR bu sinov yadro quroli portlashi imitatsiyasi ekanini taʼkidlagan. Kecha Yaponiya va Janubiy Koreya harbiylari ballistik raketalar uchirilgani to‘g‘risida maʼlum qilgandi. Rasmiy Pxenyanga ko‘ra, yadro portlashi imitatsiyasi 500 metr balandlikda o‘tkazilgan. Unda “yer-yer” turidagi taktik ballistik raketalardan foydalanilgan.
Kim Chen In yadro quroliga zarur materiallarni ishlab chiqarishni ko‘paytirishga chaqirdi. U mamlakat har qanday holatda bu turdagi quroldan foydalanishga tayyor bo‘lishini aytgan.
KXDRning Janubiy Koreya va AQSH bilan munosabatlari sovuqlashgach, raketa sinovlari keskin ko‘paydi. O‘tgan haftada Respublika birinchi marta suv osti dronini sinovdan o‘tkazgandi.
