Farg‘onada ohak sexi 18 mlrdlik gazni noqonuniy ishlatdi
Bu mart oyining o‘zida viloyatda aniqlangan 6 ta holatdan biri.
Farg‘ona viloyatida mart oyi davomida ulgurji isteʼmolchilar tomonidan 18 mlrd so‘mdan ziyod tabiiy gazdan noqonuniy foydalanish holatlari aniqlandi. Bu haqda Energetika vazirligi matbuot xizmati xabar berdi.
Qayd etilishicha, mart oyi davomida «O‘zenergoinspeksiya» va huquqni muhofaza qiluvchi organlar bilan hamkorlikda Farg‘ona viloyatida o‘tkazilgan nazorat tadbirlari davomida 6 ta ulgurji isteʼmolchi tomonidan tabiiy gazdan noqonuniy foydalanilayotgani aniqlangan.
Dastlabki hisob-kitoblarga ko‘ra, gaz taʼminoti korxonasiga yetkazilgan umumiy zarar miqdori 18,352 mlrd so‘mni tashkil etgan. Jumladan, Farg‘ona shahrida joylashgan xususiy korxonaga qarashli ohak ishlab chiqarish sexida hech qanday hujjatlarsiz 18,314 mlrd so‘mlik tabiiy gazdan noqonuniy foydalanilgan.
“Hozirda qoidabuzarlarga nisbatan huquqni muhofaza qiluvchi organlar tomonidan qonuniy baho berilmoqda”, — deyiladi xabarda.
