Qo‘qonda talaba qizlar yotoqxonasiga yashirin kamera o‘rnatildi
Holat bo‘yicha vazirlik munosabat bildirdi.
Ijtimoiy tarmoqlarda Qo‘qon pedagogika institutining talabalar turarjoyida qizlarning xonasida yashirin kamera o‘rnatilgani haqida xabarlar tarqaldi. Holat yuzasidan Oliy taʼlim, fan va innovatsiyalar vazirligi rasmiy munosabat bildirdi.
Qayd etilishicha, bugun, 4 aprel kuni vazirlik rasmiy telegram kanalining muloqot botiga qizlar yashaydigan TTJ xonalaridan biriga kuzatish kamerasi yashirincha o‘rnatilgani haqida maʼlumot berilgan.
Vazirlikning Farg‘ona hududiy boshqarmasi masʼullari institutga borib, vaziyatni o‘rganganda qizlarning xonasiga videokamera o‘rnatilgani aniqlangan.
“Oliy taʼlim, fan va innovatsiyalar vazirligi ushbu voqea yuzasidan xizmat tekshirishi o‘tkazilishini va aybdor shaxslar aniqlangach, ularga nisbatan tegishli choralar ko‘rilishini maʼlum qiladi”, — deyiladi xabarda.
