Qo‘qondagi institutda qizlar yotoqxonasiga kamera o‘rnatilishi ortidan 4 kishi ishdan olindi
Yana bir nafar xodimga intizomiy jazo qo‘llangan.
Avvalroq Qo‘qon davlat pedagogika institutining qizlar yotoqxonasiga yashirin kamera o‘rnatilgani xabar qilingandi. Holat yuzaidan Oliy taʼlim, fan va innovatsiyalar vazirligi qo‘shimcha maʼlumot berdi.
Qay etilishicha, bevosita jarayonda ishtirok etib, xizmat vazifasini suiisteʼmol qilgan 4 nafar masʼul xodim, jumladan, prorektor egallab turgan lavozimidan ozod etilgan va bir nafar mutaxassisga intizomiy jazo chorasi qo‘llangan.
“Vazirlik inson shaxsiy hayotiga o‘zboshimchalik bilan aralashish, shaxsiy maʼlumotlarni ochiqlashga urinish kabi xatti-harakatlarni qattiq qoralaydi, ushbu holatni talaba-qizlarning shaʼni va qadr-qimmatini kamsitish deb baholaydi. Hech kim inson erki va shaxsiy hayotiga daxl qilishga haqi yo‘q deb hisoblaydi.
Voqea ishtirokchisi bo‘lgan qizlarning tazyiqsiz taʼlim olishlari kafolatlanadi. Huquq-tartibot organlari tomonidan tekshiruv ishlari davom ettirilayotganini maʼlum qilamiz”, — deyiladi xabarda.
