Andijonda obodonlashtirishda ishlaydigan ikki ayol kaltaklandi
Ijtimoiy tarmoqlarda tarqalgan xabarlar yuzasidan viloyat Oila va xotin-qizlar boshqarmasi rasmiy munosabat bildirdi.
Ijtimoiy tarmoqlarda Asaka tumanida obodonlashtirish bo‘limining ikki nafar xodimi tadbirkor tomonidan do‘pposlangani haqida xabar tarqaldi.
Unda aytilishicha, 14 aprel kuni soat 14:00 larda “Yangisor” mahallasida joylashgan tadbirkorning savdo do‘koni oldidagi xonaga tuman Obodonlashtirish bo‘limi xodimlari dam olishgan kelishgan. O‘zaro kelib chiqqan janjal oqibatida tadbirkor ayollarni kaltaklagan.
Andijon viloyati Oila va xotin-qizlar boshqarmasining maʼlum qilishicha, hodisa ro‘y bergan kunning o‘zida ayollar bilan muloqot olib borilgan. Ularga ruhiy, psixologik yordamlar ko‘rsatilgan hamda shu kunning o‘zida Asaka tumani ichki ishlar bo‘limiga xabar berilgan. Jabr ko‘rgan ayollar ekspertizaga jo‘natilgan.
Hozirda o‘rganish va ekspertiza ishlari olib borilmoqda. Jarayon oxiriga yetkazilishi bilan voqea haqida batafsil maʼlumot berilishini maʼlum qilindi.
