Andijonda IIB xodimidan qochishga uringan erkakning boshi kesilib ketdi
Holat bo‘yicha rasmiylar munosabat bildirdi.
Andijonda IIB xodimlaridan qochishga uringan mast fuqaro qo‘li va boshi kesilib ketdi. Holat yuzasidan viloyat IIB munosabat bildirdi.
Holat joriy yilining 22 aprel kuni soat 19:00 larda yuz bergan. Asaka tumani IIB profilaktika inspektori F.A. Asaka shahar Boburshox ko‘chasidagi chorrahada tez tibbiy yordam mashinasiga yo‘l bermasdan harakatlanayotgan Damas rusumli avtomashinani to‘xtatib, qoidabuzarlikni rasmiylashtirayotgan vaqtida avtomashinada yo‘lovchi sifatida ketayotgan, mast holatda bo‘lgan fuqaro G‘.A. xodimning harakatlariga keskin qarshilik ko‘rsatib, uni uyatli so‘zlar bilan haqoratlagan va jamoat tartibini buzgan.
Post-patrul xizmati xodimlari tomonidan jamoat tartibini buzayotgan G‘.A.ni IIBga yetkazish vaqtida u xodimlaridan qochishga urinib, shu ko‘chada joylashgan “Sovg‘alar” nomli do‘konga kirib, do‘kon ichkari xonasidagi eshikni ortidan tirab olishga harakat qilgan. Shu vaqtda eshik oynasi sinib, G‘.A.ning boshi va chap qo‘lining bilak qismi kesilib ketgan.
Ortidan yetib kelgan xodimlar tomonidan fuqaro G‘.A. shifoxonaga yetkazilib, unga “Chap qo‘l bilak yuqori uchligi tirsak bo‘g‘imi ichki iza sohasi 14x5 sm kesilishi oqibatida muskul, poy, qon-tomir va nerv shikastlanishi, bosh qismi chap tomon chakka sohasini kesilgan jarohati, kuchli mastlik holati” tashxisi qo‘yilgan.
Hozirda holat yuzasidan tuman prokuraturasi tomonidan tergovga qadar tekshiruv olib borilmoqda.
