11 oylik chaqaloq ikki hafta o'tib tirik topildi

 

Kolumbiya janubida aviahalokatdan ikki hafta o‘tib, to‘rt nafar bola tirik topildi. Bu haqda The Guardian nashri xabar berdi.

 

Bolalar harbiylar, o‘t o‘chirish brigadalari va fuqaro aviatsiyasi vakillaridan iborat qutqaruv guruhi tomonidan Kaketa provinsiyasidagi qalin o‘rmonda topilgan.

 

1 may kuni ertalab Ararakuaradan San-Xose-del-Guavyarega yo‘l olgan «Cessna 206» samolyoti dvigatelidagi nosozlik tufayli avariya signalini ishga tushirdi. Samolyotda yetti kishi bo‘lgan.

 

"Harbiylar tomonidan sinchkovlik bilan olib borilgan qidiruv ishlaridan so‘ng biz Guavyardagi aviahalokatda bedarak yo‘qolgan to‘rt nafar bolani topdik. Bu butun mamlakat uchun quvonchdir", — deb yozdi prezident Gustavo Petr Twitter‘dagi sahifasida.

 

Afsuski, halokatda uchuvchi va yana uch nafar kattalar halok bo‘ldi. Ularning jasadlari samolyot ichidan topilgan. 13, 9 va 4 yoshli uch bola hamda 11 oylik chaqaloq omon qolgan.

 

Qutqaruv operatsiyasini muvofiqlashtirgan fuqaro aviatsiyasi boshqarmasidan olingan dastlabki maʼlumotlarga ko‘ra, bolalar samolyotni tark etib, yordam izlashga ketgan.

 

Qutqaruvchi itlar yordamida o‘rmondan bolalar yegan mevalar qoldiqlari va o‘simliklardan himoya qilish uchun qurilgan kulbalar topildi. Qutqaruv operatsiyasiga harbiylardan tashqari Kolumbiya Harbiy-havo kuchlarining bir necha samolyotlari va vertolyotlari safarbar etilgan.