Farg‘onada sud-ekspertizasi 3 joyidan pichoqlangan fuqaroga “yengil tan jarohati” xulosasini berdi
Holat yuzasidan rasmiylar munosabat bildirdi.
Ijtimoiy tarmoqlarda Farg‘ona viloyatida ekspertizaning yengil tan jarohati xulosasidan norozi bo‘lgan fuqaro haqida xabarlar tarqaldi. Holat yuzasidan viloyat IIB rasmiy munosabat bildirdi.
Maʼlum bo‘lishicha, 2023 yilda 21 aprel kuni fuqaro B.T. Quva tumani Begat qishlog‘i markazida fuqaro A.A. bilan kelishmovchilik sababli janjallashib, B.T. yonidagi oshxona pichog‘i bilan A.A.ning o‘ng va chap son hamda qorin qismiga qasddan urib tan jarohati yetkazgan.
Tuman tibbiyot bo‘limining dastlabki xulosasiga asosan tuman IIB huzuridagi tergov bo‘linmasi tomonidan Jinoyat kodeksining 105-moddasi 2-qismi “m” bandi bilan jinoyat ishi qo‘zg‘atilgan.
Tayinlangan sudga oid ekspertiza xulosasida janjalga aralashgan 4 nafar fuqarolarda 6 kundan ko‘p davom etmaydigan, fuqaro A.A.da qorin, ko‘krak, o‘ng va chap son, yonbosh sohalarida kesilgan yaralar aniqlanib, 21 kundan ko‘p bo‘lmagan muddatga sog‘lig‘ini buzilishiga sabab bo‘luvchi yengil tan jarohatlari ko‘rsatilgan.
Fuqaro A.A ekspertning mazkur xulosasiga eʼtiroz bildirganligi sababli Sudga oid qayta tibbiy ekspertiza tayinlanib ijro etishlik uchun Andijon viloyatiga yuborilgan.
Hozirda mazkur holat yuzasidan dastlabki tergov harakatlari olib borilmoqda.
