Qarshidagi bozorda yong‘in chiqdi
Yong‘inni o‘chirish uchun 5 ta yong‘in-qutqaruv ekipaji jalb qilindi.
“Yerqo‘rg‘on” bozori hududida joylashgan do‘konning 210 kvadrat metr maydonda ichki va tom qismi yonib zararlangan.
Qarshi shahrida joylashgan bozor hududida yong‘in sodir bo‘ldi. Favqulodda vaziyatlar vazirligi hodisa to‘g‘risida rasmiy maʼlumot berdi.
Bugun, 7 iyun kuni soat 11:29 da Qashqadaryo viloyati Qarshi shahar “Yerqo‘rg‘on” bozori hududida joylashgan ikki qavatli do‘konning 2-qavatida yong‘in sodir bo‘layotganligi to‘g‘risida shahar FV bo‘limiga xabar tushgan.
Shunga ko‘ra, 5 ta yong‘in-qutqaruv ekipaji soat 11:41 da voqea joyiga yetib borib, yong‘in soat 11:55 da o‘rab olingan va soat 12:00 da o‘chirilgan. Shuningdek, qo‘shimcha ravishda 2 ta suv tashishga mo‘ljallangan transport vositasi jalb etilgan.
Dastlabki maʼlumotlarga ko‘ra, yong‘in natijasida ikkinchi qavatda joylashgan do‘konning 210 kvadrat metr maydonda ichki va tom qismi yonib zararlangan.
Hodisa oqibatida tan jarohati olgan va halok bo‘lganlar yo‘q. Hozirda yong‘in sababi va moddiy zarar miqdori aniqlanmoqda.
