Zelenskiy Rossiyani xalqaro sudga bermoqchi
Kaxovka GESi vayron qilingani sababli Ukraina BMT Xavfsizlik kengashi yig‘ilishini o‘tkazish tashabbusi bilan chiqdi.
Ukraina Kaxovka GES vayron qilingani sababli Rossiyaga qarshi Haagadagi Xalqaro jinoiy sudga daʼvo arizasi bilan murojaat qilmoqchi. Bu haqda Kiyevdagi matbuot anjumanida Ukraina prezidenti Vlodimir Zelenskiy maʼlum qildi.
Uning so‘zlariga ko‘ra, Ukraina tomoni bo‘lib o‘tgan voqea haqida Yevropa Ittifoqi va NATO mamlakatlarini allaqachon xabardor qilgan, BMT Xavfsizlik kengashi yig‘ilishini o‘tkazish tashabbusi bilan chiqqan, Bosh prokuratura esa ekotsid moddasi bo‘yicha jinoiy ish qo‘zg‘atgan.
"Fojia oqibatlari bir hafta ichida maʼlum bo‘ladi. Oddiy qilib aytganda, suv ketgach... 35 tadan 80 tagacha aholi punktlarini suv bosishi, ichimlik suvi taʼminotida katta muammolar yuz berishi mumkin. Ichimlik suvi suv toshqini kuzatilmagan hududlarda katta muammolar keltirib chiqaradi. Butun mintaqada: Dnipropetrovsk, Zaporijjya va Xersonda", — dedi Zelenskiy.
Keyinroq Ukraina prezidentining telegram-kanalida oliy bosh qo‘mondon qarorgohida Kaxovka GESdagi vaziyat bo‘yicha razvedka hisoboti eshitilgani haqida xabar paydo bo‘ldi.
"Asosiy xulosa shuki, portlash ataylab qilingan, biroq dushman tartibsiz harakat qilib, o‘z texnikasini suv bosishiga yo‘l qo‘ygan. Shu bilan birga, to‘g‘onning portlashi Ukrainaning o‘z hududlarini qaytarib olish qobiliyatiga taʼsir qilmadi", — deyiladi xabarda.
