Qoraqalpog‘istonda chekka ovuldagi shifokorlarga 5 mln so‘mgacha ustama beriladi
Shuningdek, aholining statsionarda davolanish xarajatlarini daromad solig‘idan ozod qilish taklif qilindi.
Toshkentda mavjud bo‘lgan barcha zamonaviy tibbiy xizmatlar Nukusda ham yo‘lga qo‘yiladi, olis va chekka ovullardagi tibbiyot xodimlariga 5 million so‘mgacha alohida ustama beriladi. Bu haqda Shavkat Mirziyoyev qoraqalpog‘istonlik saylovchilar bilan uchrashuvda tibbiyotga oid takliflari doirasida maʼlum qildi.
Qoraqalpog‘istondagi Onkologiya va radiologiya markazi filiali uchun yangi bino quriladi va eng zamonaviy uskunalar bilan to‘liq jihozlanadi. Uning hududida bemorlarning yaqinlari vaqtincha yashab turadigan yotoqxona barpo etiladi.
Kelasi yildan Taxtako‘pir, Chimboy, Qorao‘zak, Bo‘zatov, Shumanay, Qo‘ng‘irotda ham 200 foizlik oylik ustama to‘lash yo‘lga qo‘yiladi. Shuningdek, Qoraqalpog‘istondagi olis va chekka ovullarda ishlayotgan barcha malakali tibbiyot xodimlariga 5 million so‘mgacha alohida ustama beriladi.
“Faqat Qoraqalpog‘iston uchun, aholining statsionarda davolanish xarajatlarini daromad solig‘idan ozod qilsak, o‘ylaymanki, adolatli ish bo‘ladi”, — dedi nomzod.
Ijtimoiy reyestrga kirgan aholi order asosida Toshkent shahri yoki boshqa viloyatga davolanishga kelganida, ularga avia va temiryo‘l xarajatlari to‘liq qoplab beriladi.
Shu bilan birga, qoraqalpog‘istonlik bolalarga yuqori texnologik operatsiyalar uchun homiylik qilgan tadbirkorlarning ushbu xarajatlari soliq undirish bazasidan chegirib tashlanadi.
