Ilmiy tashkilot xodimlarining ish haqi 2 barobarga oshiriladi
Keyingi 7 yilda amaliy tadqiqotlarga davlat tomonidan 4 trln so‘m ajratiladi.
Ayni paytda xorazmlik saylovchilar bilan uchrashuv o‘tkazayotgan prezidentlikka nomzod Shavkat Mirziyoyev kelgusi yillarda ilmiy tashkilot xodimlarining ish haqi 2 barobarga oshirilishini maʼlum qildi.
«Iqtisodiyotning eng tez o‘sib borayotgan yo‘nalishlarida amaliy tadqiqotlarni kuchaytirib, ’korxona – oliygoh – ilmiy tashkilotʼ klaster tizimini faol qo‘llab-quvvatlaymiz», — deydi Mirziyoyev.
Qayd etilishicha, kelgusi yetti yilda amaliy tadqiqotlarga davlat tomonidan 4 trillion so‘m, tarmoqlar va xususiy sektor tomonidan ham yana shuncha mablag‘ yo‘naltiriladi. Shuningdek, Innovatsiya jamg‘armasiga 5 trillion so‘m ajratilib, yangi loyihalarni qo‘llab-quvvatlashga sarflanadi.
Bundan tashqari, til va adabiyot, tarix, arxeologiya, madaniyat kabi yo‘nalishlar bo‘yicha alohida ilmiy-tadqiqot dasturlarini qabul qilinadi. Natijada ushbu maqsadlarga kelgusi yetti yilda 2 trillion so‘m ajratilishi rejalashtirilgan.
