O‘zbekistonning Moskvadagi elchixonasi Rossiyada bo‘lib turgan fuqarolarga murojaat qildi
Elchixona O‘zbekistonning barcha fuqarolarini odamlar gavjum joylarga tashrif buyurmaslikka chaqirdi.
O‘zbekistonning Rossiyadagi elchixonasi hozirda mamlakatda sodir bo‘layotgan voqealar fonida o‘zbekistonlik fuqarolarga murojaat qildi.
Elchixona O‘zbekistonning barcha fuqarolarini Rossiya federatsiyasi hududida amalda bo‘lgan jamoat xavfsizligi qoidalariga qatʼiy rioya qilishga, Rossiya va Ukrainaning chegaradosh hududlariga sayohat qilmaslikka, odamlar gavjum joylarga tashrif buyurmaslikka chaqirdi.
Shuningdek, axborot maydonida tarqatilayotgan tasdiqlanmagan maʼlumotlarga berilmaslik va mamlakat rasmiy vakillarining ko‘rsatmalariga amal qilish so‘ralgan. Bundan tashqari, fuqarolarga qulaylik yaratish maqsadida mamlakatning Rossiyadagi barcha diplomatik vakolatxonalari to‘liq ish rejimida ishlayotgani maʼlum qilindi.
Zarur hollarda O‘zbekistonning Moskva shahridagi elchixonasining yagona Call-markaziga zudlik bilan murojaat qilish so‘raladi, deyiladi elchixona rasmiy xabarida.
Maʼlumot uchun, Yevgeniy Prigojin boshchiligidagi “Vagner” yollanma askarlari Rossiyaning bir qator hududlaridagi muhim infratuzilma obektlarini egallab, Moskva tomon harakatlanayotganini maʼlum qilgandi. Shundan so‘ng Vladimir Putin rossiyaliklarga murojaat qilib, davlat to‘ntarishiga urinishlar har qanday yo‘l bilan bostirilishini maʼlum qilgandi.
