O‘zbekistonda ishlab chiqarilayotgan qurilish materiallari Xitoyga yetkazib berilishi mumkin
O‘zbekiston va Xitoy hududlararo hamkorlikni yanada rivojlantirish istiqbollarini muhokama qildi
O‘zbekistonning Guanchjoudagi Bosh konsulxonasi diplomatlari tashrif bilan Janubiy Xitoyning Guansi avtonom rayoniga bordi, deb xabar bermoqda “Dunyo”.
Safar davomida Guansi avtonom rayoni Tashqi ishlar departamenti bosh direktori o‘rinbosari Song Xay Jin, Tijorat vazirligi hududiy departamenti direktori o‘rinbosari doktor Yuye Syumey va Xitoy xalqaro savdoni rag‘batlantirish tashkiloti raisi Yang Yan bilan uchrashuvlar o‘tkazildi.
Uchrashuvlarda savdo-iqtisodiy hamkorlik, madaniy va turizm aloqalarini rivojlantirish masalalari muhokama qilindi. Xususan, hudud Tashqi ishlar departamenti rahbariyati bilan muloqotda hududlararo hamkorlik, madaniy va turizm aloqalarini rivojlantirish xususida fikr almashildi.
Tomonlar hududiy korxonalar o‘rtasida o‘zaro kooperatsiya aloqalarini o‘rnatish va investitsiyalarni jalb qilish yuzasidan hamkorlikni chuqurlashtirish zarurligini taʼkidladi. Qishloq xo‘jaligi va turizm yo‘nalishlarida hamkorlik qilish uchun katta salohiyat mavjudligi qayd etildi.
Tijorat vazirligi hududiy departamenti direktori o‘rinbosari doktor Yuye Syumey bilan bo‘lib o‘tgan uchrashuv davomida savdo-iqtisodiy va sanoat kooperatsiyasi sohasidagi hamkorlikni yana-da chuqurlashtirish masalalari ko‘rib chiqildi. Xitoy xalqaro savdoni rag‘batlantirish tashkilotidagi uchrashuvda tomonlar hududiy tadbirkorlar va biznes vakillari ishtirokida qo‘shma loyihalarni amalga oshirish masalalari muhokama qilindi.
Xitoy tomoniga mamlakatdagi biznes vakillari uchun yaratilgan imkoniyatlari va respublika tadbirkorlari tomonidan ishlab chiqarilayotgan yuqori sifatli qurilish materiallari, ekologik toza qayta ishlangan mahsulotlarni Guansi bozoriga yetkazib berishga tayyorlik bildirildi.
