Hindiston va Fransiya Ukraina uchun yangi “tinchlik rejasi”ni tayyorlamoqda
Fransiya Hindistonni mojaroni hal qilishda muhim hamkor deb biladi.
Hindiston va Fransiya Rossiya va Ukraina o‘rtasidagi urushni tugatish bo‘yicha avvalgilaridan farq qiladigan yangi reja ustida faol ishlamoqda. Yangi reja Xitoy va Afrika davlatlari ilgari surgan avvalgi tinchlik tashabbuslaridan sezilarli farq qiladi.
Qayd etilishicha, Hindiston bosh vaziri Narendra Modi 13-14-iyul kunlari Parijga tashrifi chog‘ida o‘z hukumatiga Fransiya vakillari bilan birgalikda yangi reja ishlab chiqishni topshirgan.
Yelisey saroyida bo‘lib o‘tgan matbuot anjumanida Modi muhim masalalarni, jumladan, Rossiya va Ukraina o‘rtasidagi urush oqibatlarini, shuningdek, koronavirus pandemiyasi oqibatlarini hal qilish uchun dunyo davlatlarini birlashtirish zarurligini ta’kidladi.
Fransiya Hindistonni Rossiya va Ukraina o‘rtasidagi urushni hal qilish bo‘yicha tinchlik tashabbuslarini izlashda muhim hamkor deb biladi. Narendra Modi va Fransiya prezidenti Emmanuel Makron o‘rtasidagi uchrashuvning asosiy qismi Fransiya bilan Osiyo va Afrika davlatlari o‘rtasidagi munosabatlarga salbiy ta’sir ko‘rsatayotgan ushbu urushni muhokama qilishga bag‘ishlandi.
