BAAdan O‘zbekiston tarixiy shaharlariga sayyohlar oqimi ko‘paytiriladi
Dubay shahridagi O‘zbekiston Bosh konsulxonasida Amirliklarda faoliyat yurituvchi sayyohlik shirkati mudiri bilan uchrashuv bo‘ldi.
Dubay shahridagi O‘zbekiston Bosh konsulxonasida Amirliklarda faoliyat yurituvchi sayyohlik shirkati mudiri Ravshan Zokirov bilan uchrashuv bo‘lib o‘tdi, deb xabar bermoqda “Dunyo”.
Uchrashuvdan ko‘zlangan asosiy maqsad O‘zbekistonda turizm sohasida olib borilayotgan keng ko‘lamli islohotlarni targ‘ib etish, Toshkent, Samarqand, Buxoro va Xiva kabi ko‘hna shaharlarda sayohatchilar uchun yaratilgan shart-sharoitlar, respublika boy madaniy va maʼnaviy merosi to‘g‘risida maʼlumotlar berish, o‘zbek xalqining tarixi, madaniyati, urf-odatlari va anʼanalarini keng targ‘ib etish, ommalashtirish va mamlakatga xorijlik sayyohlar oqimini ko‘paytirish bilan izohlanadi.
Sayyohlik shirkati mudiri bilan O‘zbekistonga sayyohlar oqimini yana-da ko‘paytirish va ularning talablaridan kelib chiqib, yangi turizm xizmatlarini o‘z ichiga olgan maxsus turpaketlar ishlab chiqish bo‘yicha fikr almashildi.
Muzokaralar yakunida sayyohlik shirkati bilan O‘zbekistonning tarixiy shaharlariga sayyohlarni jalb etish bo‘yicha hamkorlik qilishga kelishib olindi.
